News

Attività komunitarja annwali hija l-lungo passeggio.  Ta’ kull sena tiġi magħżula rotta partikolari li tammonta għal madwar 5 sigħat ta’ mixi.  Din is-sena saret matul il-lejl.  Għalhekk fil-lejl tal-1 ta’ Novembru s-seminaristi, flimkien mas-superjuri, telqu mis-Seminarju għall-ħabta tal-11pm.  Huma rħewlha lejn Santa Luċija, wara għaddew minn ħdejn l-għajn ta’ Għar Ilma.  Komplew mexjin minn qalb ir-raba’.  Waslu fit-triq bejn ir-raħal ta’ San Lawrenz u r-raħal tal-Għarb.  Wara komplew il-mixja tagħhom lejn il-kappella ta’ San Dimitri.  Hemm iċċelebraw il-Quddiesa fis-solennità tal-mejtin kollha, fejn Dun Gabriel għamel ħsieb dwar il-purgatorju u dan x’għandu jfisser għan-Nisrani li jemmen fil-ħajja wara l-mewt.  Wara għaddew mill-Għasri, imbagħad mxew tul Wied Sara.  Għall-ħabta tal-4.15am waslu lura s-Seminarju.