Il-Festa tal-Immakulata Kunċizzjoni fis-Seminarju

Is-Sibt 8 ta’ Diċembru l-komunità tas-Seminarju ngħaqdet mal-Knisja fiċ-ċelebrazzjoni tas-Solennità tal-Kunċizzjoni. Għall-komunità tagħna din hi festa speċjali għax il-Kappella tas-Seminarju hi ddedikata lil Ommna Marija tal-Kunċizzjoni. Fl-okkażjoni ta’ din il-festa l-Grupp Liturġiku organizza diversi attivitajiet speċjali.

Il-Ġimgħa filgħaxija, is-seminaristi kellhom il-kant tal-Għasar fil-Katidral u wara saret l-adorazzjoni tal-ewwel Ġimgħa tax-xahar. Din tmexxiet minn Fr Alex Refalo u tulha saret it-talba tal-Akathistos. Din hi it-talba ta’ tifħir li l-Knisja tal-Ilvant tagħmel lil Marija Omm Alla.

Is-Sibt filgħodu kantajna t-Tifħir ta’ Sbiħ il-Jum. Wara l-Lezzjoni Qasira d-Djaknu Gabriel Gauci għamel omelija tal-okkażjoni u tkellem fuq l-oriġini tad-domma tal-Kunċizzjoni. Kompla l-ħsieb tiegħu billi spjega fil-qosor l-interpretazzjoni Kristoloġika u Ekkleżjoloġika li żewġ teoloġi kbar tas-Seklu Għoxrin (Karl Rahner u Hans Urs von Balthasar) taw lil din id-domma.

Is-seminaristi taw is-servizz tagħhom fil-Pontifikal il-Katidral u f’nofsinhar Mons. Isqof ingħaqad mal-komunità fis-Seminarju għat-Talba ta’ Nofs il-Jum. Wara l-Lezzjoni Qasira hu għamel ħsieb tal-okkażjoni. L-Isqof enfasizza fuq il-bżonn tad-djalogu bejna u bejn Alla. Hu ndika l-fatt li l-Liturġija tal-Kelma tal-ġurnata ħarġet il-kuntrast li hemm bejn Adam: li kien nieqes minn djalogu m’Alla (tant li beża’ minnu); u bejn Marija: li ħajjitha, sa mit-tnissil immakulat tagħha, kienet djalogu kontinwu m’Alla. Mons. Grech qal li jekk kull Nisrani hu mħeġġeġ li jiddjaloga m’Alla, dan jgħodd b’mod speċjali għalina s-seminaristi u s-saċerdoti. Bħalma fl-istituzzjonijiet soċjali d-djalogu jsegwi ċerta struttura, id-djalogu tas-saċerdot m’Alla jrid ikun ukoll strutturat. Hu spiċċa billi spejga liema hi l-istruttura ta’ dan id-djalogu: it-talb, l-istudju akkademiku u l-ubbidjenza għas-superjuri. Dawn kollha jridu jwasslu lis-seminarista u lis-saċerdot biex jikkomunika m’Alla.